相信關注開英國留學嘅同學仔都知道,有部分英國大學設有9月開學同翌年1月開學嘅基礎班/ 國際一年級課程。咁開學時間不同,課程又會唔會唔一樣呢?
延遲開學,照樣翌年九月升讀學位課程
我哋以Durham University嘅基礎班為例,9月入學嘅話,會從9月一直讀到翌年6月;1月入學嘅話,會從1月一直讀到8月,兩者都會銜接翌年9月大學開學。不過,大家從下圖睇到,由9月讀到6月嘅基礎班有兩個月左右的暑假,有一定時間可以緩衝同放鬆;而1月份開學就一讀讀到8月,然後緊接住9月大學開學,時間上比較趕急。但無論9月或1月開學,大部分學校的課程內容、收生要求都唔會有太大分別。

e75ca28f2ef04f898603aad0b71228eb

既然分別唔大,咁點解學校仲要特登設置一個1月份入學呢?我歸類咗三個主要原因——

1. 考唔切UKVI IELTS

HKDSE 每年7月放榜,有部分學生收到DSE成績後先臨急抱佛腳咁籌劃海外升學。而大部分英國銜接課程都需要學生應考UKVI IELTS(用於申請英國簽證的雅思考試),但問題就在於7、8月份的UKVI考期非常搶手,同學考唔切UKVI就錯過咗9月開學。


2. IELTS唔夠分

有些學生即使考咗UKVI,但偏偏達唔到學校的英文要求(總分5.0 ~5.5)。這個情況之下,學生就必須提前6週~3個月左右到英國參與學校安排的Pre-sessional English英文課程,完成後才能升上銜接班。但香港學生收到成績時往往已經7、8月,並沒有足夠時間來完成英文課程。唯一的解決辦法就是將銜接班順延至翌年1月開學,而開學前的幾個月則用來上英文課程,彌補IELTS分數上的不足。


3. 年齡不足未能參與9月入學

英國銜接課程的收生最低年齡限制係17歲,有些學生在9月份入學前未滿17歲,所以學校不會接受其申請。但咁樣唔通要學生足足等1年等到翌年9月先可以再入讀?考慮到這一點,學校開設了1月開學的銜接課程,以解決一些學生9月入學年齡不足的問題。


1月開學銜接班有利有弊?

同學聽到英國設有1月份開學的銜接課程,係咪即刻想「拖延症」發作呢?雖然1月開學的銜接課程有一定的存在意義。但如果情況許可,我都建議同學仔在復活節假期時考好UKVI IELTS,爭取儘早入讀。一來,1月讀到8月的銜接課程時間很緊湊,仲未好好放假就已經要上大學;二來,雖然同學在入讀大學銜接班時會獲得聯繫大學的有條件錄取,但萬一同學想轉校去其他大學,都需要透過英國聯招系統(UCAS)來報名。而問題就在於UCAS首輪截止日期是1月15號,1月才入學的同學仔未必趕得切遞交報名,如果錯過了1月15號,某些大學的熱門科目就有機會額滿了。
其實,如果同學仔趕唔切9月開學,但又唔想將自己投閒置散等1月開學,亦都可以考慮一些10月尾開學的銜接課程,例如University of Liverpool就有10月讀到 8月的Enhancement基礎班,課程會多了學術/英文的支援,為同學打好底子。現在9月先啱啱開始,今年升讀中五同中六嘅同學仔,記得磨礪以須,提早做好準備啊!
By Adrian Ng
Oh!爸媽