26/02/2018

【點解牛津劍橋唔出foundation?】

剛剛在農曆新年前收到為數不少的中五同學仔求救,他們深知以現時自身成績無辦法成功應付來年的香港公開試,故此希望查詢在今年完成中五後,於9月負笈英國讀Foundation 的院校選擇及收生標準。
回想起我2011年大學畢業時,大學基礎班 (Foundation) 還未普及,當其時甚至連國際一年級 (International Year 1) 也聞所未聞。赴英升學途徑一般都不外乎先讀寄宿中學,考英國A-level上大學;或直接以香港公開試成績直入英國大學。

時至今日,留學市場上的課程及科目多不勝數,升學途徑款式多,學生及家長睇到眼花撩亂。最擔心係,一個相對較低嘅收生門檻,讀完一年就可以上大學,當中更不乏一些英國前30名的院校,係咪真係咁輕鬆?香港家長一向心水清,除了要顧及排名,都一定要考慮埋入大學銜接率。一時就聽到黃師奶炫耀個仔讀完Foundation入到英國前十名牌大學;另一邊廂就聽到陳生個女好徬徨,因為讀完Foundation 之後銜接唔番上大學,可惜以 Foundation 成績又不能回香港升學,變相兩頭唔到岸。

聽到咁多有關Foundation的升學個案,學生及家長都對Foundation呢個課程抱有懷疑,唔知應該點揀先最適合孩子的成績及學習優勢。

我先分享兩位Foundation同學的個案分享,然後再解釋這兩個個案的亮點。

得不償失同學A

同學A 於HKDSE取得44333分數,剛剛夠入University of Bath Foundation,主修Business,但可惜最後同學A 的Foundation 成績達不到升上大學的要求,不能夠原校直升。經朋友的推薦下,他找我解決升學問題。經過一番討論及配對後,我替同學A成功入讀Swansea University 大學一年級。

果斷同學S

同學S 的中五成績中等,根據他的成績和心儀科目電子工程來說,他的成績足夠入讀 University of Nottingham 及 University of Lancaster Foundation。但經過詳細分析後,他決定入讀 Bellerbys College Foundation。因為完成後可以重新報UCAS (英國大學聯招),不用限制學生升讀原校,同時可獲得兩間大學 Durham University 和 Lancaster University 有條件錄取 (Conditional offer)。最後,同學S 於翌年入讀 The University of Sheffield 大學一年級,變相比同期的香港同學早一年入大學!

各位睇完呢兩個個案後,明白我想帶出箇中的意思嗎?

第一,雖然起步點有年級及成績的高低之分,但得出來的結果卻有意想不同的驚喜!市場上Foundation的種類太多,學生或家長對課程有所混淆並不奇怪。但有一點各位需要明白,Foundation 並不是入讀牛津劍橋的捷徑,亦不是開辦Foundation 的原意,做選擇時不要只看重於大學的排名而忽略了將孩子現時的學習能力作為重要考量。一年的 Foundation 課程並不是神丹妙藥,最緊要係學生能夠銜接返上大學,順利以好成績畢業。

第二,得不償失同學A 當年如果用HKDSE成績入讀Intentional Year 1(IY1) 的話, 完成IY1 後直入大學二年級,他現在應該是大學三年級。當然你會覺得,如果他 Foundation 成績好的話,現在他就是University of Bath 的學生。但試想想,以一間收HKDSE 三科electives 555 的商學院,要維持本身的學術水平,能經 Foundation 收多少學生?

最後,有好多家長都問及有關 LSE Foundation。我又想問各位,基於英國簽證理由, Foundation 是不能重讀的。面對這可一不可再的升學關口,如果牛津劍橋都開Foundation,你又敢唔敢搏?

原文:http://www.ohpama.com/270813/overseas/%E3%80%90adrian-ng%E3%80%91%E9%BB%9E%E8%A7%A3%E7%89%9B%E6%B4%A5%E5%8A%8D%E6%A9%8B%E5%94%94%E5%87%BAfoundation%EF%BC%9F/?aid=28757

最新
升學
消息